ROXAS CITY – Makabig nga suki na sang presohan ang mister nga ginserbehan sang search warrant sa Purok 3, Barangay Libas, Roxas City, kaina sang aga.
Ginkilala ang subject person kay Sandy Dela Cruz Silverio, residente sang nasambit nga barangay.
Sa interview sang Bombo Radyo kay Barangay Kagawad Joey Soberano sang Libas, ginsiling niya nga madamo na sang rekord sa ila Barangay si Silverio kun sa diin kalakip diri ang pagpangluthang sa katapo sang SWAT nga nagresponde sa binaylehan sang tuig 2008 ukon 2010, kag sang tuig 2018 naman nagpangtaya sang armas-luthang sa isa ka babayi nga kalapit niya balay nga lunsay gintunaan sang iya pagkapreso.
Matandaan suno kay PLt.Col Aron Palomo, Hepe sang Roxas City PNP, nga anay preso ang subject person sa kaso nga Grave threat on the use of unlicensed firearm apang natigayon nga makaguwa sang 2021.
Gintuad pa ni Barangay Kagawad nga nagpamahog si Silverio nga habuyan sini sang granada ang Brgy. Hall kag amu man ang ginahimo sini sa mga pumuluyo.
May kaangtanan sa iligal nga droga, wala gintuad ni Soberano kun kalakip sa listahan sang Barangay Anti-Drug Abuse Council (BADAC) si Silverio apang ginmonitor nila ini sang may nagpalab-ot nga reklamo nga masami may nagapadulong nga mga estranghero sa puluy-an sini.
Mahibaluan narekober ang wala pa matumod nga sahi sang armas-luthang, mga bala, cellphone kag ginaalegar drug paraphernalia sa balay sang suspek.
Ginpanginwala naman sang suspek ang alegasyon sa iya kag ginpahayag “planted” ang ginpatigayon nga operasyon sang otoridad.
Nagapasalamat man suno diri ang mga pumuluyo sa Purok 3 nga nadakpan na si Silverio bangud makatulog na sila sang maayo kag madula na ang kakulba.
