ROXAS CITY – (Update) – Magapadayon sa pagpangita sang hustisya ang pamilya Agustino apisar ginlubong na ang ila haligi sang puloy-an.
Matandaan nga sang Marso 10, ginbawian sang kabuhi matapos ang kapin tatlo ka bulan nga pagtenir sa West Visayas Medical Center sa Iloilo sang biktima sa pagkakuryente nga si Judy Agustino, sang Brgy. Jaena Norte, Jamindan, Capiz.
Si Agustino amu ang bana ni Rubelyn Agustino nga kaupod sini nakuryente sang tinalikdan nga Nobyembre 2021, matapos natumba ang poste nga kahoy sang Capiz Electric Cooperative (Capelco) sa Brgy. Milan, sa amu nga banwa.
Ginpanindugan sang ginang, nga ang gintunaan sang ila pagkatumba sa motorsiklo kag pagkakuryente amu ang naglatag nga kable sang kuryente sa karsada, bangud sa natumba nga poste.
Matandaan nga nagdangat sa kapin P3 milyon ang balayran sang himata sa nasambit nga ospital.
Nakahatag sang P10,000 ang pamunuan sang Capelco sa pamilya, apang suno sa himata, kulang ini nga bulig para sa ila.
Sa pihak sini, nagahimo na sa karon sang tikang ang pamilya Agustino agud ipadayon ang pagpasaka sang kaso batuk sa nasambit nga electric company sa probinsya.
