ROXAS CITY-Pilason ang isa ka lalaki matapos ginbuno sang kaugalingon nga abyan sa Barangay Lapaz banwa sang Jamindan, Capiz.
Ginkilala ang biktima kay Leny Galagate, 30 anyos kag pumuluyo sang nasambit nga lugar.
Sandig sa inisyal nga imbestigasyon sang Jamindan Municipal Police Station, nagainom-inom ang biktima sa puluy-an sang isa ka abyan sini sang nag-abot ang suspek nga ginkilala kay Mario Fundar, 45 anyos kag residente man sang nasambit nga barangay.
Mahibaluan nga samtang nagainom-inom ang duha ka mga imbolbado nga persona kaupod ang iban pa nga abyan sang naglisensya ang suspek nga magapauli na ini apang pagbalik sini wala sang rason nga ginbuno ang biktima gamit ang kutsilyo.
Nagaguha sa imbestigasyon nga nag-angkon sang isa ka buno sa likod ang biktima nga madasig man nga ginpadangat sa Mambusao District Hospital agud madapatan sang nagakaigo nga pagbulong.
Boluntaryo man nga nagsungka ang suspek sa Punong Barangay sang nasambit nga lugar kun sa diin gilayon man nga ginturned-over sa hanay sang mga kapulisan para sa nagakaigo sini nga disposisyon.
Ginapatihan nga posible daan nga hiligut-anon ang motibo sang pagpangbuno sang suspek sa biktima.
