Pagpangluthang ang gintunaan sang kamatayon sang 23-anyos nga miyembro sang LGBTQ nga nasapwan sa Crossing Bato, Brgy. Banica, Roxas City.
Ini ang gintul-id ni PSMS Ramil Arcangeles, Public Information Officer sang Roxas Component City Police Station sang ma-interview sang Bombo Radyo.
Suno kay Arcangeles, naguwa sa resulta sang autopsy nga nakaangkon sang lima ka igo sang bala sa lawas ang biktima nga si John Paul Dullano ukon alyas “Takray” kun sa diin tatlo ka igo sa likod, isa ka igo sa kamot partikular sa may pulso dapit kag isa man ka igo sa liog.
Madumduman sa inisyal nga imbestigasyon sang mga kapulisan, ginpahayag nga ginbuno si alyas “Takray” apang bangud may nakit-an nga basiyo sang armas-luthang sa tupad mismo sang biktima, gindesisyonan sang pamilya nga ipaidalom ini sa autopsy.
Nahibaluan nga sang tinalikdan nga tuig 2023 naulamid si alyas “Takray” sa mga nadakpan sa ginkasa nga drug buybust operation sang PDEA sa isa ka lodging house sa Barangay IV, Roxas City.
