ROXAS CITY –— Natalana nga pasakaan sang panumbungon nga robbery ang isa ka miyembro sang ginapatihan Salisi Gang nga nadakpan sang mga otoridad matapos gintuyo nga mag[angawat sang bag nga nagaunod sang tuman ka daku nga kantidad sang kuwarta sang isa ka negosyante sa Teodoro Arcenas Trade Center.
Nakabilanggo sa karon ang suspek nga si Ferdie Tañada 27-anyos sang Tondo, Manila.
Sa imbestigayon sang Roxas City PNP nagpadulong si Tañada sa TATC kaupod ang duha ka iban pa nga wala nakilala nga mga suspetsado sa diin nagpakuno kuno sila nga magabakal sang baligya ni Rosemae Costelo.
Suno sa tindera, kasubong nga ginalita lita siya sang mga suspek sa diin wala sini gilayon natalupangdan nga ginkuha na ni Tañada ang iya nga bag nga nagaunod sang masobra sa P320,000 nga cash, gold bracelet nga nagabalor sang masobra sa P300,000 kag mga ATM cards nga nagaunod sang daku nga kantidad sang kuwarta nga nagalab-ot P2.6 million.
Gilayon nga nagbiya ang mga suspek apang nagsinggitan si Costelo rason nga naalarma ang mga tawo sa palibot.
Nakorner sang mga matadero si Tañada sang nagdiretso ini sa meat section sang tindahan samtang nakapalagyo ang duha ka mga kaupdanan sang suspek.
