Nagdangat sa 870 tonelada sang mga basura ang nahakot sang mga tinawo sang Metropolitan Manila Development Authority (MMDA) sa Metro Manila kasunod sang lapnagon nga pagbaha nga tuga sang supertyphoon Carina kag Hanging Habagat.
Ang nasambit nga volume suno kay MMDA Acting Chairman Romando Artes, ginalauman nga lalo pa nga magataas bangud sa nagapadayon pa ang ginahiwat nga clearing operations kag may mga lugar pa nga kinahanglan sa mahaba-haba nga pagpaninlo.
Madamo sa mga nasambit nga basura ang gintambak sa mga dalanon, drainage, pampubliko nga lugar, kag iban pa nga ginaabot sang tubig baha.
Napuno man sang lapok ang pila ka mga lugar bangud sa pag-apaw sang mga kasubaan nga nagdala sang mga madakmol nga lapok.
Samtang, sa tunga sang clearing operations, nakatuon suno diri ang MMDA sa pagkay-o sa Malabon-Navotas River Navigational Gate nga nangin rason agud maglugdang sa tubig baha kag tubig ala tang madamo nga komyunidad diri.
Suno kay Artes, bisan pa kumplikado ang pagkay-o sa nasambit nga gate, kinahangla nga maghiwat sang nagakaigo nga aksyon angut diri sa madali nga mga tinion.
Ginsiguro naman suno diri sang Department of Public Works and Highways (DPWH) ang pagtutok sa nasambit nga problema agud maabot ang timeline sa rehabilitasyon sini.
