ROXAS CITY – Madinalag-on ang una nga semana sa pagbukas sang face-to-face classes para sa school year 2022 – 2023 sa bug-os nga probinsya sang Capiz.
Sa pakig-angut sang Bombo Radyo kay Dr. Miguel Mac Aposin, DepEd-Capiz Division Superintendent, ba-se sa monitoring sang ahensya kapin 97% sang mga estudyante ang nagpartisiparar sa pagpanumbalik sang klase.
Aminado si Aposin, nga may ginhimo sila nga adjustments ilabi na sa mga hulot-klasehan agud mapabilin ang social distancing kag malikawan ang pagdinutdutanay sang estudyante.
Samtang, nagpangabay man ini sa mga ginikanan nga wala pa napaenrol ang ila kabataan nga magpadulong na sa mga buluthoan bangud padayon sa gihapon nagabaton sang enrollees.
Dako naman ang pasalamat sini sa mga kapulisan kag mga enforcers nga nagabulig agud mapabilin nga malinong, matawhay kag safe ang mga kabataan pag-abot sa eskwelahan.
