ROXAS CITY – Daan nga hiligut-anon ang nagtulod sa suspek agud luthangon-patay ang 47-anyos nga security guard kahapon sang hapon, Oktubre 10 sa Barangay Ibaca, President Roxas.
Sa pakig-angut sang Bombo Radyo kay PCpt. Alfred de Leon, hepe sang President Roxas MPS ginpahayag sini nga may daan nga hiligutanon ang biktima nga si Tio Garcia kag suspek nga si Keyn Almendral kun sa diin nag-umpisa ang indi pag-intindihanay sang ginaalegar ginbuno ni Garcia ang tiyo sang suspek sang 2012.
Apang suno sa hepe, natigayon naman nga masettle ang magtimbang nga bahin sa korte.
Maluwas diri, ginapahayag nga bangud man sa kinamatarong sa duta naglala pa gid ang away sa tunga sang duha.
Suno kay de Leon, nga ba-se man sa pahayag sang suspek, madugay na ini nga ginahinikayan ni Garcia.
Sang natabo ang insidente nag-abtanay ang duha sa lugar kag , ginapahayag naghana ang biktima nga may ginagabot sa dala nga bag rason nga gin-unahan ini sang suspek sang gabot sang 357 revolver nga armas-luthang kag ginpalukpan sang makaapat ka beses si Garcia.
Madasig man ini nga nagpalagyo apang nadakpan man ini sang mga kapulisan pinaagi sa hot pursuit operation sa Brgy. Cayus banwa sang Pilar.
Matandaan nga nag-angkon sang patal nga pilas sa ulo kag magkatuhay nga bahin sang lawas si Garcia nga gintunaan sang iya kamatayon.
Suno kay de Leon, desido ang pamilya sang biktima nga magpasaka sang kaso nga murder batuk kay Almendral.
Sa karon, nagapabilin sa kustodiya sang Pres Roxas MPS ang suspek para sa nagakaigo nga disposisyon.
