ROXAS CITY – Posible pagpangawat ang motibo sa pagbuno-patay sa isa ka school principal sa Green Earth Subdivision, Barangay Mongpong, Roxas City ini matapos nga wala makit-an sa sulod sang apartment ang wallet sang biktima.
Sa pakig-angut sang Bombo Radyo kay Aurelio Cadaing, tenant sa kaiping nga apartment suno diri, nakabati siya sang lagubo sa apartment ni Jun Mencedez kag ang pagpangayo sang tabang sang menor de edad nga bata sang biktima.
Apang ginkatingala sini, nga sarado man ang gate sang apartment ni Mencedez.
Gilayon sini nga ginpadulungan ang menor de edad kag nakit-an nga may pilas ang bata amu man ang amay sini nga yara nakahigda sa salog nga nagapaligo sang kaugalingon nga dugo.
Suno kay Cadaing, nag-angkon sang 3 ka buno sa li-og, 3 sa dughan kag lima sa likod ang biktima samtang nabuno man sang ikatlo ka beses ang butkon sang bata.
Antes pa matabo ang insidente, may duha ka lalaki nga nagpadulong sa apartment sang biktima kun sa diin ginkilala ang mga ini nga sanday Alvin Aniero kag John Peter Obarra, residente sang Brgy. Balat-an, Mambusao agud mag-inom-inom.
Sa panaysayon ni Cadaing, ba-se man sa nangin pahayag sang bata, ginpatulog sang amay sini si Obarra sa ikaduha nga padalgan sang balay bangud sila nalang nga duha ang matulog sa dalom.
Dugang pa sini nga nauna nga ginbuno ang bata kag nabugtawan si Mencedez kag gindepensahan ang bata, ginapahayag nagbayluhay pa sang inumok ang duha tubtob nga nabuno ni Obarra ang principal kag nag-angkon sang patal nga mga pilas nga gintunaan sang iya kamatayon.
Sa karon, padayon nga ginabulong sa ospital ang bata para sa pagbulong samtang nagapadayon ang imbestigasyon angut sa insidente.
