Nakit-an na ang isa ka motorsiklo nga ginpahayag ginkawat sa Barangay Punta Tabuc, Roxas City.
Ginkilala ang biktima kay alyas Vic, 57-anyos, samtang ang suspetsado ang ginkilala kay alyas Jay 27-anyos kag residente sang Barangay 1, syudad sang Roxas.
Sa impormasyon nga nakuha sang Bombo Radyo nagikan sa Roxas Component City Police Station, ginpahayag nga ginpark sang iya umagad ang motorsiklo malapit sa Jumbo Bridge sa nasambit nga barangay.
Apang takna alas 3 sang magaaga, disyembre 24, natalupangdan nalang nga wala na ini sa ginparkingan ang amo nga motorsiklo.
Ginreport nila ini sa mga kapulisan didto kag madasig naman nga gin-aksyonan sang mga katapo sang kapulisan rason nga nabalik naman ini sa tag-iya
Sa karon, sulod sa karsel sang Roxas City Police Station ang suspek kag natalana nga pasakaan sang nagakaigo nga kaso.
