Natigayon nga nabiktima sang duha ka mga kawatan ang isa ka kapitan kun sa diin ginkawat ang battery sang iya motorsiklo nga naka-parking sa higad sang dalanon sa Barangay Jumaguicjic, Roxas City.
Sa interview sang Bombo Radyo kay Punong Barangay Rizal Dichosa sang Brgy. Jumaguicjic, ginpahayag sini nga ang amo nga motorsiklo ang ginapanag-iyahan ni Kapitan Albert Calipayan sang Brgy. San Jose kag ini ang ginamenho sang iya bata kag gin-parking lamang sa nasambit nga lugar sang natabo ang insidente.
Pinaagi sa isa ka kuha sang CCTV footage, nakita kun paano gintaban sang duha ka kawatan ang battery sang amo nga motorsiklo.
Dugang pa sini, ginapahayag nga pangayaw ang mga ini bangud wala sini nakilan-an kag indi pamilyar ang mga nawong sang mga ini.
Bilin naman ni PB Dichosa sa mga pumuluyo, kun may nakakakilala sa mga suspetsado, ipaalinton gilayon sa mga otoridad agud matapna ang mga kasubong nga insidente kag mapasakaan sang nagakaigo nga panumbungon ang mga ini.
