ROXAS CITY – Nagdangat na sa 174 ang nabalhag nga napatay bangud sa nagluntad nga stampede pagkatapos sang hampang sa tunga sang Arema FC kag Persabaya Surabaya sa East Java Province, Jakarta, Indonesia.
Sa pakig-angut sang Bombo Radyo kay Bombo International Correspondent Ginavella Limpin–Cumla, direkta sa Indonesia, ginpahayag sini nga maluwas sa napagkit nga napatay, 11 naman ang kritikal samtang padayon naman nga ginapadapatan sang pagbulong ang 298 nga mga napilasan.
Ginsiling sini nga sa bug-os nga kasaysayan sang pungsod, ang nasambit nga insidente ang pinakamataas nga numero sang napatay kun sa diin ang tanan nga katawhan sa Indonesia ang nagakasubo bangud sa trahedya.
Wala suno diri ginalauman sang mga event organizers ang insidente kun sa diin hinali nga nagpanaug sa oval ang kapin 3,000 nga mga supporters sang Arema FC agud atakehon ang mga nagdaug nga players sang napiyerde ini sang ginakabig greatest rival nga Persabaya Surabaya.
Maluwas sa pag-atake sa mga players, ginsalakay man sang mga fans ang mga kapulisan nga gintunaan sang kamatayon sang duha ka pulis.
Mahibaluan nga ang nasambit nga event ang sarang lamang maka-accommodate sang 38,000 seats apang naglab-ot sa 42,000 ang nabalhag nga tumalan-aw.
Isa sa mga factor nga ginatan-aw sa amu nga hitabo amu ang sarado nga exit point kun sa diin wala kaguwa ang mga tawo kag nagdinaguso sa pertahan.
Samtang, nagmandu naman si Indonesian President Joko Widodo nga hatagan sang special treatment ang biktima kag pagasabton sang gobyerno ang medical expenses sang mga ini.
Suspendido naman ang football game tubtob wala pa matapos ang imbestigasyon sang mga kapulisan.
Dugang pa ni Cumla, masuwerte nga wala sang mga Pilipino nga naulamid sa trahedya.
