ROXAS CITY – Aminado ang tagdumalahan sang Capiz Provincial Health Office (PHO) nga manubo kag mahinay ang pagbakuna sang booster shot sa probinsya.
Sa interview sang Bombo Radyo kay Mr. Julius Vicson Dela Cruz, National Immunization Program Manager sang Capiz PHO, ginpahayag sini nga sa 492,716 nga fully vaccinated sa probinsya kag target sang ahensya nga makapaturok sang booster shot, 44,530 ukon masobra 6% pa gid lang sang target ang nakabaton sang booster dose.
Bangud sa manubo nga numero sang nagapa-booster sa probinsya, nagapadulong kada barangay ang nagkalain-lain nga mga katapo sang municipal health office, agud magpangbakuna.
Ginpahayag ni Dela Cruz nga samtang nagalakat ang panahon, naganubo man ang proteksyon nga mahatag sang bakuna, gani importante gid ang pagpaturok sang booster dose agud padayon nga maproteksyunan batuk sa COVID-19.
