Roxas City – Yara na karon sa hinuptan sang Department of Environment and Natural Resources (DENR) ang isa ka Brahminy Kite Eagle ukon “Banog” matapos nga narescue sang mga residente sa Barangay Bonga, Panay, Capiz.
Suno kay Forester Nonilon Molina, chief conversation division sang DENR nga yara na sa ila hinuptan ang nasambit nga pispis.
Ginpahayag ni Molina nga indi makabig nga ‘pure’ nga agila ang nasambit nga pispis apang ginakunsiderar ini sa gihapon nga may lahi sang agila.
Gin-athag sini nga indi pa mahimo buy-an ang banog bangud nakakas ang pila ka parte sang iya sini pakpak.
Ginpakamaayo na lamang sang DENR nga atipanon ang nasambit nga pispis kag temporaryo nga ginbutang sa isa ka kurungan.
Sa pihak nga bahin, yara naman sa hinuptan sang Philippine Coast Guard-Capiz ang na-rescue nga pawikan ukon olive ridley sea turtle sa Barangay Culasi, Roxas City.
Ginpahayag ni Molina nga gintugyan nila ang nasambit nga pawikan sa talatapan sang PCG-Roxas bangud nagakinahanglan ini sang tubig dagat. Samtang, natalana naman i-turn-over subong nga adlaw sa Southeast Asian Fisheries Development ukon SEAFDEC ang nasambit nga pawikan.
