ROXAS CITY – Ginhanduraw sang isa ka anay suldado ang mga nangin eksperyensiya kag makabig kontribusyon sa probinsya, kadungan sang pagselebrar sang ika-124 nga anibersaryo sang kahilwayan sang pungsod Pilipinas.
Sa interview sang Bombo Radyo kay Ret. Col. Leonilo Malasa, ginpahayag sini nga masubo man ipahayag apang indi na masyado makit-an sa Pilipino ilabi na sa mga ulihing tubo nga henerasyon ang ginatawag nga Nasyonalismo ukon pagpalangga sa pungsod.
Dugang pa diri amu ang indi pagpakita sang pagtahud kag kaangay nalipatan na sang kadam-an sa aton nga Pilipino ang importansya sang Hunyo 12, bangud pipila nalang ang nakikita sini nga nagabalandra sang hayahay sang Pilipinas sa ila mga salakyan ukon puloy-an kada Independence Day.
Bangud sini, pabor ang anay suldado nga mapatuman ang Reserve Officers’ Training Corps (ROTC), sa pagtulon-an sang mga estudyante, agud matudok sa mga tagipusuon sang mga pamatan-on ang pagpalangga kag pagtahod sa aton nga pungsod.
Sa pihak nga bahin, nagpasalamat man si Malasa sa gobyerno, nga wala ang mga ini ginakalimtan sa ila magagmay nga kontribusyon sa naangkon nga kalhiwayan sang Pilipinas.
