Liwat nga nagdaug ang National Capital Region sa basketball – secondary girls sa Palarong Pambansa 2025 batok sa Davao Region nga may dominante nga score nga 78-42.
Suno kay NCR head coach Camilla Denise Acosta, tuman ang ila kalipay bangud nagbunga ang tanan nga sakripisyo, paghanas, kag kabudlay sang mga kabataan.
Ginhatagan niya sang importansya nga indi mahapos ang ila mga kasumpong sa rehiyon, rason kon ngaa mas ginhatagan nila sang bili ang ini nga kadalag-an.
Wala nila ginalauman ang resulta apang suno kay Coach Acosta, ang plano lamang amo ang isa ka hampang sa isa ka tion.
Dugang pa niya nga ang katapusan nga katuyuan amo ang mangin back to back champion
Magluwas sa kadalag-an sa Palarong Pambansa, nagapreparar man ang team sang NCR nga magpadulong sa Singapore para sa NBA Rising Star Invitational.
Nagpaambit man sang kalipay ang team captain nga si Aubrey Lapasaran.
Dugang pa ni Lapasaran nga ang pag-angkon sang paghiliusa kag komunikasyon bilang isa ka grupo ang isa sa mga yabi sa ila kadalag-an.
