SAPIAN, CAPIZ – Negatibo sa resulta sang post-mortem examination ang Senior Citizen nga nasapwan-patay sa iya puluy-an sa ginaalegar nga pagpanghimulos sa Sitio Bulon, Barangay Bilao, Sapian, Capiz.
Matandaan nga ginkilala ang biktima kay Dionila Doroteo, 71-anyos kag residente sang nasambit nga lugar.
Sa interview sang Bombo Radyo kay PMSG Louie Banate, imbestigador sang Sapian MPS, naguwa sa resulta sang autopsy sang bangkay sang biktima nga negatibo ini sa pagpanghimulos kag posible nga matig-a nga butang ang ginlampos sa ulo sino kabangdanan sa iya sini nga nangin kamatayon.
Dugang pa ni Banate, posible nga nabutong sang suspek ang underwear sang biktima sang nagalagsanay ang mga ini rason nga nabilin ini sa guwa sang iya puluy-an.
Samtang, may ara na nga person of interest ang nagapabilin nga “at large” ang status nga ginatutukan sa karon sang mga kapulisan kag padayon pa ang pag-proseso sang mga dokumento para mapasakaan ini sang kaso kag matigayon nga madakpan.
Matandaan nga wala na sang kabuhi ang senior citizen sang masapwan sang tinalikdan nga Setyembre 10, 2024.
Sa karon, padayon pa nga ginapadalman sang mga katapo sang Sapian PNP ang ginahiwat nga imbestigasyon angut sa nasambit nga insidente.
