ROXAS CITY – Kasunod sang pagsarado sa tanan nga mga patyo sa pungsod sa maabot nga Oktubre 29 tubtob Nobyembre 4 sini nga tuig bangud sa pagkahangawa sa Coronavirus Disease ukon COVID-19, madamo man sang mga negosyante ang apektado sa ila nga negosyo.
Partikular na ang mga nagabaligya sang mga kandila kag mga pagkaon sa mga patyo sa adlaw mismo sang tigkalalag.
Suno kay Mrs. Ana Que, negosyante sang Banica Public Cemetery kag madugay na nga nagabaligya sa nasambit nga patyo nga wala man sang problema sa ila kun para man lang sa kaayuhan sang tanan ang pagdumili sa pagpakadto sa patyo agud malikawan ang Coronavirus Disease ukon COVID-19.
Aminado man ini nga mabudlay para sa ila apang mas maayo na lamang nga hilway ang tanan batuk sa makamamatay nga virus.
Apisar nga nagakita ini sang daku sa pagbaligya sa amo nga patyo wala sa gihapon ini sang mahimo bangud para man ini sa kaayuhan sang tanan.
Mahibaluan nga nagakita ini sang kapin sa P16,000 sa tagsa ka baligya sini sa adlaw sang tigkalalag.
