ROXAS CITY – Ginhangkat karon sang pamunuan sang Traffic Management Unit (TMU) ang indibidwal nga yara sa likod sang naglapta nga post sa social media site nga gina-akusahan ang isa ka traffic auxiliary sang pagpangilkil nga magpakita kag magpadulong sa ila talatapan, agud pamatud-an ang iya nga reklamo.
Ginpahayag ni Mr. Junie Jun Hervias nga nabasa sini sa social media site ang nasambit nga akusasyon batuk kay traffic auxiliary Castillo sang wala nagpakilala nga complainant.
Apang tobtob sa karon wala sang reklamo nga ginpadangat sa ila talatapan agud pamatud-an ang alegasyon.
Suno kay Hervias nga sa iya bahin, personal sini nga ginpamangkot ang nasambit nga auxiliary kun ano ka matood ang yara sa social media nga nagalapta sa karon.
Apang suno kay Hervias nga ginpanginwala ni Castillo ang akusasyon nga nagpangilkil ini sa gindakup nga tricycle nga nagapaguwa na sa Roxas City, bangud ang matood ginhatagan pa niya ini sang kunsiderasyon bangud magapauli na sila sa Panay sa pihak nga wala ini sang ginpakita nga driver’s license.
Ginklaro pa ni Hervias nga sa kasubong sini nga sitwasyon, gina-impound ang salakyan pribado man ukon indi, basta wala sang mapakita nga lisensiya ang driver.
Samtang ginpasiguro man ni Hervias sa complainant pananglitan nga mapatud-an nga nagpangilkil si Castillo, gilayon nila ini nga i-terminate kasubong sang ila ginahimo sa iban nga mga traffic auxiliaries nga mapatud-an nagalapas sa pagsulundan.
