ROXAS CITY – Ginpatpat sa Bombo Radyo ni Roxas City Mayor Ronnie Dadivas ang mga pagsulundan nga ipatuman sa siyudad sa ukon ang ‘new normal’ sa idalom sang Modified Enhanced Community Quarantine (MGCQ) sumugod Hunyo 1, 2020.
Suno sa alkalde, sa idalom sang MGCQ, amat-amat na nga magabalik sa ila operasyon ang mga establisyemento-komersiyal kapareho sang malls, kalan-an, hotels kag iban pa.
Magabalik naman ang transportasyon sa siyudad kalakip na ang pag-biyahe sang mga Public Utility Jeepneys (PUJ’s) kag tricycle.
Apang ginklaro sang alkalde nga may mga health protocols sa gihapon nga kinahanglan sundon sa idalom sang MGCQ.//
Suno kay Dadivas nga 50 porsyento lamang nga kapasidad sang mga establisyemento-komersiyal ang dapat nga mag-operate kun sa diin limitahan ang magasulod nga mga customers.
Ginklaro man sini nga wala pa dalayon nga ginabalik ang ‘market day’ ukon tinda sa Teodoro Arcenas Trade Center sa tagsa ka adlaw sang Dominggo.
Pag-abot naman sa naga-biyahe nga mga tricycle, pagasundon sa gihapon ang odd-even scheme kag one passenger policy samtang ila pa nga tun-an kun ano ang maayo nga himuon sa dalayon nga pagbalik sang biyahe sang mga tricycle.
Ang mga jeepneys lamang nga may special permit gikan sa Land Transportation Franchising and Regulatory Board (LTFRB) ang mahimo makabiyahe sa siyudad kag may sundon man nga health protocols sa pagpamasahero sang mga ini kun sa diin 50 porsyento lamang sang seating capacity ang pahanugutan makasakay nga pasahero.
Magapabilin naman ang curfew hour sa siyudad sang Roxas kun sa diin ginpaisol ini humalin alas 11 sa gab-i tubtob alas 4 sa aga agud mahatagan sang kahigayunan ang pila ka mga negosyo nga makabukas.
Nakahanda naman nga magsunod ang gobyerno sang siyudad sa desisyon sang gobyerno-probinsiyal sa pagdumili pa sa pagbaton sang commercial flights sa Roxas City Airport.
Indi man anay magbaton sang mga tawo nga magasulod sa magkatuhay nga mga pantalan sa siyudad ilabi kun halin sila sa iban nga probinsiya.
Ginpanindugan man sang alkalde nga magapabilin sa gihapon ang border control checkpoint sa mga magasulod sa siyudad sang Roxas.
