ROXAS CITY – Arestado ang ang isa ka lalaki sa ginkasa nga drug buybust operation sang Station Drug Enforcement Agency sang Roxas City Police Station sa Barangay Cagay, Roxas City.
Suno kay Police Lt. Col. Dante Tayco, hepe sang Roxas City PNP, ginkilala ang nadakpan kay Alberto Abisan, 32 anyos sang Barangay 9, sining siyudad.
Narekober sa posesyon ni Abisan ang pito tanan ka sachets sang ginapatihan shabu nga ginabulubanta nagabalor sang kapin P20, 000, isa ka unit sang cellphone, isa ka pouch, P500 nga cash kag P500 nga marked money.
Suno kay Tayco, madugay nila ginpaidalom sa monitoring ang suspek antes ini ginpaidalom sa operasyon.
Ginakabig naman nga street-value target ang nasambit nga drug suspek.
Sa karon, nakahunong na sa karsel sang Roxas City PNP ang suspek kag natalana nga pasakaan sang panumbungon nga paglapas sa Republic Act 9165 ukon Comprehensive Dangerous Drugs Act of 2002.
