ROXAS CITY-Ginkompirmar sang National Food Authority (NFA)-Capiz nga sa ila ginkuha sang lokal nga gobyerno sang banwa sang Sapian ang bugas nga ila ginpanagtag sa mga kabarangayan.
Sa interview sang Bombo Radyo sa kay Mr. Redentor Dela Cruz, Rice Specialist Officer sang NFA-Capiz nga sang tinalikdan nga bulan sang Hunyo katapusan nga nagkuha sa ila sang bugas ang lokal nga gobyerno sang banwa sang Sapian.
Apang gin-athag sini nga bag-o nga ga-ling ,good rice kag wala sang sapat-sapat ang ila nga gin-release nga bugas sa nasambit nga banwa.
Suno pa kay Dela Cruz nga regular nga ginasekyar sang Quality Assurance Officer ang mga naka stock nga mga bugas sa ila nga bodega agud mapasiguro nga indi ini pagbukbokon kag hilway sa mga sapat-sapat.
Samtang ginkompirmar man ni Dela Cruz nga dako ang posibilidad nga mangin bukbokon ang bugas kun madugay na ini nga nakatago sa bodega.
Suno sa kay Dela Cruz nga sa sulod sang tatlo ka bulan kinahanglan na nga I-dispose sa bodega ang mga bugas bangud prone na ini sa mga sapat-sapat kag bukbok.
