ROXAS CITY – Emosyunal ang nobya sang kolektor sang isa ka lending company matapos nakumpirma nga ang nasapwan nga lalaki sa Sitio Cassandra, Barangay Punta Tabuc, Roxas City amo ang nobyo nga nadula.
Sa exclusive interview sang Bombo Radyo Roxas kay “alyas Jean” nobya sang biktima nga si Renante Cepra nga antes natabo ang insidente nag-istorya pa sila sang iya nga nobyo sadtong Hunyo 11 kag nakasugid pa ini sa iya nga may yara ini sang problema sa iya nga trabaho.
Ginpahayag ni “alyas Jean” nga sadto nagmuno sa iya ang biktima nga kasubong gusto na sini magpanginmatay bangud sa ginasuprer nga problema sa trabaho.
Apang, wala siya nagalaom nga minatud-on ini sang iya nobyo.
Nakibot na lamang si “alyas Jean” sa pagpuli niya sa ila boarding house wala na sini maabtan si Cepra apang nakita sini ang ginsuksok nga uniporme sang kahagugma.
Gintinghuan pa nga tawagan ni “alyas Jean” ang nobyo apang naga-ring lamang ang cellphone sini kag wala ginasabat sang biktima.
Bangud sini, nagpangayo na sila sang bulig sa mga otoridad kag nagpanawagan sa estasyon sang Bombo Radyo matapos nga pila na ini ka-adlaw nga wala nakapauli sa ila nga boarding house.
Apang, nakibot na lamang ang nobya sang nakabaton sila sang tawag nga may yara sang nasapwan nga bangkay kag yara na sa state of decomposition sa Barangay Punta Tabuc sining siyudad sa diin sang ila padulungan ang lugar, nakumpirma sini nga ini na ang nadula nga nobyo.
Samtang desidido ang pamilya sang biktima nga mapaidalum sa otopsiya ang bangkay sini agud matul-id ang gintunaan sang iya nga kamatayon.
