ROXAS CITY – Nagsaka ang numero sang mga estudyante nga nagpa-enroll sa Capiz State University ukon CAPSU Mambusao Campus.
Ini ang ginpahayag ni Dr. Adelfo Z. Virtudazo, Satellite College Director sang mainterview sang Bombo Radyo.
Suno kay Virtudazo nga ginabulubanta naglab-ot sa masobra 500 ang mga nagpa-enroll sa nasambit nga eskwelahan para sa pagbukas sang klase sa S.Y 2020-2021 sa pihak sang ginapangatubang nga COVID-19 Pandemic.
May yara man sang apat ka mga transferee sa nasambit nga unibersidad ang naghalin pa sa pribado nga mga buluthuan.
Dugang pa sini nga halos 90% sa mga estudyante ang nagpili sang learning modalities nga modular learning.
Mahibaluan nga ang ginikanan sang mga estudyante nga naga-edad sang 21-anyos panubo ang nagakuha sang ila nga mga modules.
Magluwas diri, may yara man sila sang mga cellphone ukon Tel No. nga ginhatag sa mga estudyante agud indi na mabudlayan sa pagpa-enroll.
Ginpahayag pa ni Virtudazo nga wala man sila sang may nabaton nga reklamo natuhoy sa mga ginhatag nga modules sang ila mga manunudlo.
Samtang, padayon sa gihapon ang mga ginapatuman nga mga pagsulundan kapareho sang mga health and safety protocols sa mga estudyante kag manunudlo agud malikawan nga malatnan sang makamamatay nga virus.
Matandaan nga nag-untat naman ang enrollment sa nasambit nga unibersidad sadtong bulan pa sang Agosto.
