Naglab-ot na sa indi magnubo sa 67 ang napatay bangud sa grabe nga pagbaha sa Texas lakip na ang 21 ka mga kabataan.
Suno kay Larry Leitha, ang Sheriff sang Kerr County sa Texas Hill Country, nga amo ang sentro sang grabe nga pagbaha, ang kadamuon sang mga napatay sa iya county naglab-ot sa 59—lakip ang 21 ka kabataan.
Suno kay Leitha, 11 ka mga dalagita kag isa ka camp counselor ang nadula pa sa isa ka summer camp malapit sa Guadalupe River, nga nag-awas pagkatapos sang mabaskog nga ulan nga nag-igo sa sentral nga Texas sang Biyernes, kadungan sang selebrasyon sang Independence Day sang Estados Unidos.
Dugang pa, may 18 ka mga tigulang kag apat ka mga kabataan nga wala pa makilala sa Kerr County. Wala man sini ginpahayag kun nalakip ang ini nga 22 ka tawo sa numero sang 59 nga nagkalamatay sa nasambit nga probinsya.
Ang mga opisyales nagsiling sang Sabado nga kapin sa 850 ka mga tawo ang naluwas, lakip ang iban nga nagakapit sa mga kahoy, pagkatapos sang hinali nga bagyo nga nag-ula sang tubtob 15 ka pulgada (38 cm) sang ulan sa rehiyon, mga 85 milya (140 km) sa aminhan-nakatundan sang San Antonio.
Samtang, indi pa matumod kon pila ang padayon nga missing sa amo nga lugar.
