ROXAS CITY – Paga-ibanan sang gobyerno-probinsiyal sang Capiz sa liderato ni Governor Esteban Evan ‘Nonoy’ Contreras ang numero sang mga scholars sa idalom sang sadto anay administrasyon ni former governor Antonio del Rosario.
Ini ang ginpahayag ni provincial administrator Dr. Edwin Monares sa ginpatawag nga sinapol kun sa diin ginpalab-ot ang estado sang scholarship program sang gobyerno-probinsiyal.
Suno kay Monares nga sa 11 milyones pesos nga pondo para sa amo nga programa para sa tuig 2019, kapin sa 9 milyones pesos na ang napaguha nga pondo sa 1st semester bangud sang kadamuon sang scholars.
Suno kay Monares nga nagalab-ot sa halos 4, 900 ang scholars sang nakaligad nga administrasyon ni Del Rosario.
Bangud sang kadamuon sang scholars sang nakaligad nga administrasyon, ginpahayag ni Monares nga posible may lamud-pamulitika ini bangud wala ma-screen sang husto ang mga applicants sang nasambit nga programa.
Bangud diri suno kay Monares, ila paga-ibanan ang mga scholars pinaagi sa pag-check sang record sa eskwelahan sang mga estudyante.
Ang nabilin nga 2 milyones pesos nga pondo para sa amo nga programa ang dugangan sang administrasyon ni Contreras sang 3 milyones pesos pinaagi sa supplemental budget kag ini ang gamiton para sa 2nd semester.
