Nagpanawagan ang Office of Civil Defense (OCD) sa gobyerno nga gilayon nga hibaluon ang mga lugar kun sa diin patindugan sang mga evacuation centers, ilabi na nga nagahilapit na ang tig-ululan.
Suno kay OCD Administrator Undersecretary Ariel Nepomuceno, apisar nga indi mapatindog ang mga pasilidad subong nga tuig, kinahanglan nga padasigon ang proseso sa pagtumod sang mga lokasyon.
Ginpanindugan ni Nepomuceno nga dapat gamiton ang duta sang gobyerno bangud ang proseso sang pagbakal sa pribado nga sektor ang magasto kag naga-ubos sang tion. Gindugang sini nga ang desinyo sang Department of Public Works and Highways (DPWH) dapat mag-igo sa lote nga may mga pasilidad kaangay sang study area, lugar para sa mga nagapasuso nga iloy, prayer room, kusina, tubig, kag kuryente.
Gintumod man ni Nepomuceno ang kinahanglanon sang permanente nga mga evacuation centers para sa mga apektado sang paglupok sang Bulkang Kanlaon, ilabi na sa sulod sang 4-6 kilometros nga danger zone.
Sa subong, may yara sang 22 ka mga evacuation centers nga ginagamit kun sa diin 11 diri ang mga eskwelahan nga naga-apekto sa klase.
Samtang, masobra naman sa 8,100 ka mga tawo ang nagatinir subong sa mga evacuation centers, kasunod sang paglupok sang Bulkan Kanlaon subong nga semana.
Padayon nga nagapabilin sa Alert Level 3 ang bulkan nga nagakahulugan nga may yara sa gihapon sang posibilidad sang short-term eruptions nga posible makatuga sang katalagman sa mga pumuluyo.
