Magasugod na sa pag-imbestiga si Ombudsman Jesus Crispin ‘Boying’ Remulla angut sa isyu sang ‘confidential funds’ ni VP Sara Duterte.
Ini kasunod sa pagsumiter sang sulat sang grupo nga TINDIG Pilipinas sa Office of the Ombudsman, partikular kay Ombudsman Jesus Crispin ‘Boying’ Remulla.
Sa sulat nga ginpadala sa nasambit nga opisyal, ginpahayag sang mga ini nga katuyuan amo ang paghingyo sa iya nga maghimo sang aksyon ukon mag-imbestigar sa mga alegasyon nga yara sa articles of impeachment nga ginpasaka batok kay Vice President Sara Duterte.
Ginpanindugan man sang nasambit nga grupo nga indi dapat pagbalewalaon ang isyu kag alegasyon nga gina-atubang ni Vice President Sara Duterte.
Isa sa mga luyag nila ang paimbestigaran ukon tsekyaron sang Ombudsman ang confidential kag intelligence funds, apang aminado si Remulla nga kinahanglan niya anay basahon kag usisaon sang maayo ang nasambit nga sulat.
Matandaan nga wala nadayon ang ginalauman nga ‘impeachment trial’ batuk kay VP Sara Duterte kag gindeklarar ini nga ‘unconstitutional’ ukon wala nagasanto sa layi nga ginpaguwa sang Korte Suprema.
Apang, ginpahayag ni Ombudsman Remulla nga iya pagabinagbinagon ang Articles of impeachment bilang pagsulundan sa pagpatigayon sang fact-finding.
