Opisina sang Provincial legal officer sa Capiz, ginsulod sang kawatan

Dakop sa akto ang isa ka lalaki matapos nga ginsulod ang opisina sang Provincial Legal Officer subong nga adlaw.

Ginkilala ang suspetsado sa kay alyas “Ponpon”, 31-anyos kag residente sang Sta. Barbara, Iloilo.

Sa impormasyon nga nakuha sang Bombo Radyo nagikan sa Roxas Component City Police Station, ginpahayag nga nagpakuno-kuno ang amo nga lalaki nga magpangayo sang bulig kag nagsulod sa opisina sang legal officer.

Nakit-an sang guwardiya nga daw kaangay makaduluda ang hulag sang nasambit nga suspetsado rason nga gilayon nila ini nga gindakop.

Nahibaluan nga narekober sa nasambit nga suspetsado ang balor P12,590 nga kwarta nga nakuha sa iya nga bag.

Sa karon, padayon pa ang imbestigasyon sang mga kapulisan angut sa insidente.