ROXAS CITY -Wala pa sang ideya ang mga Barangay Officials sang Barangay Punta Tabuc sining siyudad natuhoy sa pagpahamtang sang mga Asymptomatic patients nga nagpositibo sa COVID-19 sa CPC Campus sa Calipayan Street sa nasambit nga barangay.
Ini ang ginpahayag ni Punong Barangay Nestor Buenviaje sang mainterview sang Bombo Radyo.
Suno kay Buenviaje nga wala pa sang ginpalab-ut nga impormasyon ang probinsiya natuhoy sa plano nga himuon nga quarantine facility ang nasambit nga lugar.
Apang sa tion nga mapalab-ut na ini sang probinsiya sa nasambit nga opisyal, indi pa makapasalig si Buenviaje bangud hinalaan pa nila ini sa konseho.
Ini bangud ginpahayag sini nga may yara sang mga indibidwal nga nagaistar malapit sa nasambit nga buluthuan.
Samtang, suno naman sa mga residente nga indi sila pabor sa nasambit nga plano nga gamiton bilang quarantine facility ang nasambit nga lugar.
Matandaan nga gintanyag sang Archdiocese of Capiz ang CPC Calipayan Campus nga gamiton ini nga quarantine facility bangud indi available ang Cagay Seminary.
