ROXAS CITY – Ginsabat sang pila ka mga opisyales sang Barangay Mongpong ang ginpalab-ot nga problema sa “IPA-BOMBO TA, IPA-BOMBO NATON) sang pila ka mga residente ang perwisyo nga dala sang maligna nga karsada sa nasambit nga barangay.
Sa interview sang Bombo Radyo kay Barangay Kagawad Onyok Adalantar ginpahayag sini nga masobra duha katuig na nga ginaantus sang mga pumuluyo ang nasambit nga problema partikular na ang mga umalagi kag mga motorista.
Magluwas diri, apektado man ang mga residente nga nagaagi sa maligna nga karsada nga naghalin pa sa mga Barangay Culasi, Culajao, Punta Cogon kag Gabuan sining siyudad.
Suno kay Adalantar nga madugay na ini nga problema kun sa diin ginpakamaayo na lamang nila nga tambakan ini sang buga agud nga mahagan-hagan man ang madanlog nga dalanon kag indi makaperwisyo sa mga pumuluyo.
Apang, indi malikawan nga magbalik sa maligna ang dalanon sa tagsa ka magbubo ang mamunog nga pag-ulan. Samtang, ginpasalig naman sini nga ginaproseso na nila kag ginaaksyunan ang tanan agud nga mapakaayo kag mapasemento ang nasambit nga dalanon.
