ROXAS CITY – Plano karon sang konseho sang siyudad nga makadihon sang ordinansa nga may katuyuan nga mahatagan sang insentibo ang mga barangay tanod sa magkatuhay nga mga kabaranggayan sa siyudad sang Roxas.
Ini ang kasunod sang ginpatigayon nga diskurso-pribiliheyo ni City Councilor Jericho Celino sa sesyon sang Sangguniang Panlungsod.
Suno kay Celino nga plano sini nga magduso sang ordinansa para mahatagan sang katumanan ang handom sini nga mabuligan ang mga barangay tanod.
Ginpahayag sang konsehal nga may yara sang dako nga papel ang mga barangay tanod sa pagpabilin sang kalinong kag seguridad sang isa ka komunidad apang sila man ang may dako nga risgo sa ila nga trabaho.
Suno pa kay Celino nga sang ini ang nagaserbi pa lamang bilang punong barangay sang Barangay San Jose, ginaibanan sini ang iya sweldo para may ihatag sa mga barangay tanod bangud nahangpan sini ang kabudlay sang ila trabaho.
Bangud diri plano sang konsehal nga magpatawag sang committee meeting agud mahinalaan kun sa diin pagakuhaon ang pondo nga igapain para sa plano nga paghatag sang insentibo sa mga barangay tanod.
