ROXAS CITY – Ginatugyan na ni outgoing Governor Esteban Evan Contreras sa mga kamot sang Sanggunian Panlalawigan ang patigayunon nga pagbawi sang 56 tanan ka mga transport vehicle para sa imbentaryo kag paghibalo kun ano ang rekisitos sang lokal nga gobyerno sa pagpanagtag sang amu nga behikulo.
Sa interview sang Bombo Radyo kay Contreras, ginpahayag sini nga wala man ini sang proyekto nga wala nagakontra ang SP apisar nga nagsunod ini sa proseso, kag ang pagpanagtag sang brand new nga transport vehicle ang bangud sa hinyo sang mga kabarangayan.
Wala man sang problema suno sa iya kun ipakakas ang tinaga nga “Kabalaka” sa amu nga salakyan bangud ini nga tinaga ang gingamit lamang agud magtudok sa huna-huna sang Capiznon ang buot silingon sang “care” kag sa mga nauna nga administrasyon, may kaangay man sini nga proyekto.
Nagti-aw man ang magapanaug nga gobernador nga ang pagkabalaka nagapabilin apisar nga madula na ang paghigugma, kaangay sa pag-upod sang mag-asawa.
