ROXAS CITY – Nadesisyunan ni outgoing Governor Esteban Evan “Nonoy” Contreras nga magapahuway na ini sa pulitika kag tion naman agud magpangabuhi ini sang pribado, kun sa diin pagatutukan sini ang ila negosyo, pamilya kag hatagan sang tion ang kaugalingon pagkatapos sang eleksyon.
Ini ang ginpahayag ni outgoing Governor Contreras sang mainterview sang Bombo Radyo.
Suno diri, kapin 18-ka tuig man ang iya pagpanerbisyo sa mga Capiznon humalin sang nagpangalagad ini sa pagka-board member, vice governor kag governor.
Apang wala ini naghinulsol ukon nakanugunan sa iya pagpanerbisyo kag liwat nga pagpadalagan.
Ang importante suno diri nga nahimo niya ang kutob sa iya masarangan para sa Capiz kag ginatugyan nalang sa Makaako ang iya mangin masunod nga desisyon.
Samtang, mangin pribado naman ang pangabuhi sang iya pamilya kag magatutok man sa ila negosyo.
Nahibaluan nga wala sang pamilya Contreras, nga nangin madinalag-on sa ila ginpapilian nga posisyon sa probinsya sang Capiz.
Sa pihak nga bahin, handum sang magapanaog sa posisyon nga gobernador nga mangin maumwad pa ang Capiz kag nagpasalig nga pagasuportahan sini ang magatal-os sa iya nga si Governor-elect Cong. Fredenil ‘Oto’ Castro, kag nagpalab-ot sang iya hantup nga pagpanamyaw sa bag-o nga amay sang probinsya.
