ROXAS CITY – Pilas sa liog, tiyan at dughan ang naangkon sang mag-asawa nga Andrada nga ginluthang-patay sang mga suspek nga naghold-up sa ila sa Barangay Jolongahog, Pontevedra, Capiz.
Dala sang nagpalagyo nga tatlo ka mga suspek nga nakasakay sa motorsiklo ang bag nga nagaunod sang mas o menus sa P500,000.
Suno kay Senior Inspector Marvin Balmes, hepe sang Pontevedra PNP nga madalumon nga imbestigasyon ang ginapatigayon sang pulisya para matumod ang mga suspek nga responsable sa pagpangluthang sa mag-asawa nga Renato kag Salome Andrada.
Sa pag-usisa sang pila ka nakasaksi, ginpahayag nila nga handa kuntani sila nga magbulig sa mga biktima, apang wala sang mahimo bangud armado kag nakatutuk sa mga biktima ang armas sang nagaisahanon nga triggerman.
Nagapati man si Balmes nga ginaplanuhan ang paghold-up sa mag-asawa bangud nahibaluan kun ano ang oras sa pagpadulong sa banwa sang President Roxas tagsa ka adlaw sang Biyernes dala ang daku nga kantidad.
Kumpyansa ang opisyal nga makilala man ang mga suspek sa pihak nga nakasuksok sang bonnet ang triggerman bangud indi habangbuhay nga makapanago sa kasuguan ang may sala.
