Natukiban sang 10 ka mangingisda gikan sa Bataan ang 10 ka sako sang nagalutaw-lutaw nga shabu sa kadagatan sang Masinloc, Zambales nga ginabanta nagabalor sang P1.5 billion, suno sa Philippine Drug Enforcement Agency (PDEA).
Ginpahayag sang PDEA nga nadiskubrehan sang mga mangingisda ang iligal nga droga sadtong Mayo 29 kag gin-turn over ini sa mga otoridad kahapon nga adlaw, Hunyo 2.
Sa sulod sang 10 ka sako ang may 223 ka nagkalain-lain nga vacuum-sealed nga transparent plastic packs nga nagaunod sang iligal nga droga.
Sa isa ka separado nga pahayag, ginsiling sang Philippine Coast Guard (PCG) nga nakabaton sila sang ulat halin sa isa ka mangingisda nahanungod sa mga sako sang ginpatihan ginadumilian nga droga.
Bangud sa kahadlok, ginpahayag sang PCG nga gintago sang mangingisda ang kontrabando sa isa nakatiwangwang nga barge sa Mariveles, Bataan.
Gin-inspeksyon sang K9 units sang Coast Guard ang mga sako kag ginkumpirma ang presensya sang ginapatihan iligal nga droga.
Gilayon naman nga nakig-angut ang Coast Guard Station Bataan sa PDEA-Bataan nga nagpatigayon sang on-site assessment kag ginkumpirma nga iligal ang mga nakuha nga bagay.
Nagmando ang PDEA Regional Office 3 sang imbestigasyon agud matumod ang ginhalinan sang droga. Naga-coordinate na ang mga anti-illegal drug agents sa Bataan kag Zambales sa iban pa nga ahensya sang layi kag lokal nga gobyerno.
Suno sa PDEA, ipaidalom sa forensic examination ang mga nakuha nga droga.
