ROXAS CITY – Ginpanindugan ni Board Member Thea Faith Reyes nga indi siya makaupod sa Strategic Planning seminar kag Executive Legislative Agenda (ELA) sa Davao City sa masunod nga semana bangud suop na ang oras sang nabaton ang imbitasyon sang executive department.
Aminado man si Reyes nga indi ini pabor nga didto patigayunon sa Davao ang nasambit nga mga aktibidad, bangud magasto.
Suno sa opisyal nga mahimo makapatigayon sang aktibidad nga malapit lamang sa probinsiya sang Capiz kasubong sa Iloilo nga magluwas nga menos gasto sa pamasahe sa eroplano kag hotel accomodation magamit pa sa mapuslanon nga programa ang pondo sang gobyerno kasubong sa diaysis center kag scholarship.//
Ginpahayag pa sini nga sa karon wala sang pondo ang iya talatapan para sa travel expenses.
Ginakwestyon man ni Reyes ang kasuop sang tiyempo nga na-imporma sila sa provincial board bangud kasubong nga ginba-se lamang sang ehekutibo sa ila availability ang schedule kag wala anay sila ginkunsulta.
Suno sa opisyal nga kuntani ginbinag binag man ni Provincial Administrator Dr. Edwin Monares antes nagdesisyon sa amo nga biyahe.
Samtang nagapati si Reyes kun wala sang quorum bangud kulang ang numero sang mga board members nga maga-upod sa Davao City, wala sang matabo nga Executive Legislative Agenda ukon ELA.
