ROXAS CITY – Nagparekord sa pulisya ang isa ka senior citizen matapos nga ginaalegar gintayaan sang armas luthang kag gintaban ang kwarta nga nagabalor sang P104,000 sa Barangay Agtambi, Dao, Capiz.
Ginkilala ang biktima nga si Leonida Paja 60-anyos sang nasambit nga lugar.
Sandig sa ginpabalhag sang biktima nga samtang nagalantaw ini sang television sa sulod sang ila balay sang hinali na lamang ini nakabati sang kinagamo sang iya mga sapat rason nga naguwa ini sa ila balay.
Apang, sang pagguwa na sini diri kag gintutukan sang wala matumod nga suspek sang armas luthang ang biktima kag gintaban ang bag nga may unod nga kwarta nga nagalab-ot sa P104,000 kag gilayon nagpalagyo.
Bangud diri, ginpakamaayo na lamang sang biktima nga ipabalhag sa pulisya ang natabo.
Padayon naman ang imbestigasyon sang mga kapulisan agud matumod ang suspek nga responsable sa nasambit nga insidente.
