ROXAS CITY – Narekober sang Roxas Component City Police Station ang P170,000 nga balor sang iligal nga droga nga may kabug-aton nga 25 grams sa Barangay Loctugan, Roxas City, Capiz.
Ang durugista amo si Mark Budiao, isa ka street level individual kag residente sang nasambit nga barangay.
Sa interview sang Bombo Radyo kay Police Chief Master Sergeant Ramil Arcangeles, Spokesperson sang Roxas Component City Police Station, iya ginpahayag nga madugay man nga gin-monitor sang otoridad ang subject person kag yara ini sa Barangay Anti-Drug Abuse Council (BADAC) watch list.
Suno ka Arcangeles, ang mga recoveries sa subject amo ang isa ka plastic sachet sang shabu nga amo ang buy bust item; lima ka plastic sachet nga yara sa possession sang subject; P2,000 buy bust money kag pila ka mga non-drug items.
Nagapanawagan ang natungdan sa publiko nga i-report sa otoridad ang mga mahibaluan nga naga-engage sa iligal nga droga agud mapabilin ang kalinong sang komunidad.
