ROXAS CITY – Ginpanubo sa P3,000 ang mabaton nga ayuda sang mga pumuluyo bangud madamo ang apektado sang pagbaha kag kulang ang pondo para diri.
Ini ang ginpahayag ni Mrs. May Rago Castillo, tagpamaba sang Department of Social Welfare and Development (DSWD) Region 6 sang ma-interview sang Bombo Radyo.
Base sa ulihi nga report sang DSWD, ang Western Visayas ang may yara sang 355,428 ka mga pamilya nga ginakabug-usan sang 1,346,260 ka indibidwal ang apektado sang bagyong Agaton ini as of April 19, 2022 nga data.
Samtang, ang probinsya sang Capiz ang may yara 361 ka mga barangay kag 139,142 ka mga pamilya ukon 524,066 ka mga indibidwala ang apektado.
Suno kay Castillo, nga ang banwa sang Pontevedra ang labing una kag ulihi nga nakabaton sang tig P5,000 nga ayuda.
Ginklaro man sini, nga ang report nila nga gin-submit sa national ang base man sa report nga ila nabaton matapos ang paglaslas sang bagyong Agaton kag ang kabug-usan nga figure para sa region 6 ang yara gid lamang sa kapin 300,000.
Sa karun, nagahulat pa sila nga ma-download ang pondo para sa ayuda kag kun sa tion nga mag-abot na ini gilayon man nila nga ipanagtag sa mga resipyente.
Ginakumbensi man sini ang mga pumuluyo nga apektado sang pagbaha nga tsekyaron sa LGU kun nadala ang mga ini sa listahan kag nagpahayag man nga bukas ang ila talatapan sa tanan nga reklamo nga luyag ipalab-ot pinaagi sa DSWD Western Visayas Fb page.
