ROXAS CITY – Magasugod na sa masunod nga tuig 2023 ang dugang nga P500 sa social pension subsidy nga mabaton sang mga kwalipikado ukon indigent senior citizens.
Ini ang ginkumpirmar ni Mr. Edwin Espejo, Commissioner sang National Commission of Senior Citizen sang mainterview sang Bombo Radyo.
Sa anay P500, magabaton na ang mga benepisiaryo sang P1000 kada bulan.
Ang nasambit nga pagdugang matapos na lapse into law ang R.A 11916 kun sa diin wala napirmahan sang presidente ang gin-endorso nga bill sang kongreso matapos ang 30 ka adlaw, gani responsibilidad ni PBBM nga dugangan ang pondo sa nasambit nga programa.
Paathag naman ni Comm. Espejo, magapaidalom pa sa rebisyon ukon pagbag-o ang implementing guidelines sang nasambit nga layi bangud sa idalom sang layi, Department of Social Welfare and Development (DSWD) pa ang nagahawid sang payout kag ginatun-an pa sang National Commission of Senior Citizen (NCSC) ang pamaagi sang pagturn-over sang subsidiya kun sila na ang maghawid sang programa.
Samtang, sang Hulyo 29 may ginpirmahan suno diri nga Memorandum of Agreement (MOA) sa tunga sang DSWD kag NCSC kun sa diin nakapahayag nga ang tanan nga programa may kaangtanan sa paghatag sang bulig sa mga katigulangan ang igatugyan na sa NCSC kun masapinal na ang pamaagi sang pagturn-over sang kuwarta.
Dugang pa sang opisyal, gikan sa 23 bilyon nangin masobra 25 bilyon na ang pondo subong nga tuig bangud man sa nagdugang ang kapin 250,000 nga beneficiaries, apang suno diri kalakip na sa pondo ang mga sweldo sang mga empleyado nga nagatrabaho sa idalom sang programa nga yara naman sa masobra 800 ka tawo.
Gintuad pa ni Espejo nga wala siya sang makita nga rason nga indi nila madumala ang programa kun itugyan na ini sa ila bangud santo man sa survey sang DSWD handa ang 90% sa mga trabahante sang social pension nga maghalin sa NCSC.
Luyag man sini nga mangin universal pension ang nasambit nga programa kun sa diin makabaton ang tanan nga senior citizen sa pungsod apang magalab-ot sa 110 bilyon ang kinahanglanon nga pondo para diri.
Sa karon, padayon pa ang pag-validate sang listahan sang mga benepisiaryo kag panugyan ni Comm. Espejo sa mga senior citizens nga mangin produktibo sa komunidad kag mag-obserbar sa minimum health protocols agud mapabilin ang ikaayong lawas.
