ROXAS CITY – Indi na kinahanglan nga magtambong ang mga hospital officials bilang resource persons sa budget hearing sang Sangguniang Panlalawigan.
Ini ang ginpahayag ni Provincial Administrator Edwin Chinel Monares sang ma-interview sang Bombo Radyo Roxas.
Suno kay Monares nga nasabat na sang mga natungdan nga mga indibidwal sa radyo ang natuhoy sa apat ka mga persona nga napatay sa Intensive Care Unit (ICU) sang RMPH sang Disyembre 25, 2019.
Ginpanindugan ni Monares nga natapos na ang budget hearing sang sanggunian kag nahinala-an na ang pondo sang mga departmento sa probinsiya.
Suno pa kay Monares nga nagapadayon ang imbestigasyon nga ginapatigayon sang fact-finding committee nga gintukod sang gobernador natuhoy sa apat ka mga pasyente nga napatay sa RMPH.
Apang sa tion nga mangayo sang resulta sang fact-finding investigation ang provincial board desidido naman nga maghatag ang executive department.
Suno pa sa iya nga nakita naman sang fact finding committee ang mga problema sa RMPH kasubong sang pagkinahanglan nga magbakal sang bag-o nga generator sets.
