Naghiwat ang Philippine Air Force (PAF) sang departure honors sa base operations sang Villamor Air Base, bilang paghatag sang pasidungog sa apat ka napatay nga mga airmen sa pag-crash sang Super Huey helicopter sa Loreto, Agusan del Sur sang Nobyembre 4, 2025.
Ang mga napatay amo sanday Capt Paulie Dumagan (Makati City), 2nd Lt Royce Louis Camigla (Pasig City), Sgt. John Christopher Golfo (Noveleta, Cavite), kag A1C Ericson Merico (Real, Quezon).
Naghugpa ang C-130 nga eroplano pasado alas 7:20 sang gab-i sakay ang mga bangkay sang apat ka mga tinawo sang PAF. Gindala sang mga pallbearers nga classmates man sang napatay ang mga lungon padulong sa sentro sang honor area samtang nagasuksok sang itom nga ribbon sa ila abaga bilang tanda sang simpatiya kag pagpakig-unong.
Sa pagpanguna ni PAF Commanding General, Lt. Gen. Arthur Cordura ang seremonya sang pag-abi-abi kag paghatag sang posthumous Distinguished Aviation Cross sa mga biktima, nga lunsay mga katapo sang 505th Search and Rescue Wing sang PAF. Nagtambong man sa seremonya ang mga pamilya sang mga biktima nga tuman ang kasubo sang nag-abot ang mga ini.
Samtang, kahapon nga adlaw sang aga, ginpatigayon ang departure honors para sa duha pa ka napatay nga personnel sa Tactical Operations Wing Eastern Mindanao (TOWEeastMin) sa Davao City.
Una nga nag-abot ang bangkay ni Sgt. Yves Sijub, nga gindala sa General Santos City suno sa hingyo sang iya pamilya, samtang ang bangkay ni Airman Ameer Apion nga isa ka Muslim ang gindala sa Zamboanga City para sa tradisyonal nga lubong.
Ginpasalig ni PAF spokesperson Maria Christina Basco nga ang mga napatay nga baganihan magabaton sang anum (6) ka bulan nga sweldo, nga direkta nga igahatag sa ila namatyan nga pamilya.
