Ginpunto ni Senator Migz Zubiri nga posible nga may paglapas sa Konstitusyon ang ginpasar nga 2025 budget sang Kongreso para sa Department of Education (DepEd).
Gintumod ni Zubiri nga sa idalom sang Konstitusyon ang education sector ang dapat nga may pinakadako nga pondo sa idalom sang 2025 General Appropriations Act (GAA) apang nabaliskad na ini bangud Department of Public Works and Highways (DPWH) na ang may pinakamataas nga budget sa masunod nga tuig.
Sa idalom sang 2025 national budget, ang DPWH ang may alokasyon nga ₱1.1 trillion samtang ang DepEd ang naglab-ot lamang sa ₱737 billion.
Paathag ni Zubiri, posible nga may paglapas ini sa Saligang Batas bangud sandig sa Article 5 sang 1987 Constitution nga education sector ang highest priority kag dapat nga makabaton sang pinakamataas nga pondo sa pungsod.
Posible suno diri nga may pila ka grupo ang nagkwestyon sa nangin desisyon sang Kongreso sa korte.
Samtang, maremedyohan lamang ini kun gingamit ni President Bongbong Marcos ang iya nga veto powers sa line item budget sang ahensya.
Nagalaum si Zubiri nga mabalik kuntani ni President Marcos ang ₱10 billion nga nabuhin nga budget sa computerization sa DepEd bangud diri pa man mahina ang mga kabataan bangud sa kakulangan sang access sa computer system.
