Igapadayon sang Pilipinas ang pag-export sang raw sugar sa United States sa Agusto, kun sa diin halos apat ka tuig na ang nakaligad sang katapusan ini nga nag-ship sa America kadungan sang mga ginahinyo nagikan sa industry stakeholders.
Matandaan sadtong Marso, ginanunsyo sang US Trade Representative (USTR) nga nagpain ini sang dugang nga 25,300 metric tons raw value (MTRV) para sa Pilipinas para sa fiscal year 2024 (October 1, 2023 tubtob September 30, 2024).
Ang MTRV allocation scheme sang US government, ang nagpahanugot sa mga pungsod nga mag-export sang specified quantities sang isa ka produkto sa “relatively low tariff.”
Suno kay Sugar Regulatory Administration (SRA) administrator kag CEO Pablo Luis Azcona, aprubado sa mga exporter ang raw sugar nga kinahanglan mag-abot sa Estados Unidos sa Setyembre rason nga ipatigayon ang exportation sa Agusto.
Ang plano nga pag-export, igapatuman pinaagi sa isa ka sugar order kun sa diin pagadesisyunan subong nga bulan.
Mahibaluan nga ang katapusan nga shipment sang Pilipinas sa nasambit nga pungsod sadtong crop year 2020–2021, sa diin nagdul-ong ini sang 112,008 MT nga commercial raw sugar.
Plano man sang pungsod nga magtipon sang 200,000 MT nga refined sugar subong nga tuig agud pun-an ang ginalauman nga supply gap kag masiguro ang price stability sang produkto.
