ROXAS CITY – Nangin emosyunal ang 29 anyos nga Akeanon new lawyer matapos mahibaluan nga nakapasar ini sa 2019 Bar Examination.
Sa exclusive interview sang Bombo Radyo, ginpahayag ni Atty. Fritzie Villanueva Zaspa nga indi sang basta-basta ang iya inagihan sang gindungan sini ang trabaho kag pag-review.
Apang bangud sa kagustuhan nga makapasar, ginpakamaayo sini nga mag-resign sa iya trabaho agud tutukan ang pag-review sa Metro Manila sa sulod sang lima ka bulan.
Aminado si Zaspa na ginkulbaan siya samtang nagahulat sang resulta sang nasambit nga eksaminasyon.
Sadto pa man suno diri, handom na sini mangin isa ka abugado bisan pa nga iban nga kurso ang luyag sang iya ginikanan para sa iya.
Tuman ang pagpasalamat sini sa iya pamilya, sa iya eskwelahan nga Colegio de la Purisima Concepcion kag sa Diyos nga nagpabakod sa iya agud mapasar ang amo nga pasinawan.
Si Zaspa ang tumandok sang Libacao, Aklan apang sa probinsiya sang Capiz ini nag-eskwela sang abogasiya.
