Nagpaandam ang state weather bureau sa local public and disaster risk reduction and management offices nga mag-preparar sa delikado kag risgo nga sitwasyon nga dala sang malain nga tyempo ilabi na nga nahimo na ang mga ini bilang tropical depressions nga na-monitor sa sulod sang Philippine Area of Responsibility.
Takna alas-8:00 kagab-i sang ginkumpirma sang Philippine Atmospheric, Geophysical and Astronomical Services Administration (PAGASA) ini nga development nga kun sa diin ginhingadlan nga Butchoy ang tropical depression sa nakatundan sang Batangas samtang si Carina naman ang local name sang weather disturbance nga yara sa nasidlangan sang Eastern Visayas.
Ginpahayag sang weather bureau nga ang Habagat subong nga ginapabaskog ni Butchoy ang mas pabaskugon pa gid ni Carina umpisa sa Domingo nga maga-resulta sa pag-ulan sa western portions sang Luzon sa masunod nga tatlo ka adlaw.
Ginalauman man nga magaguwa si Butchoy sa PAR pagkatapos sang 12 ka oras, magabaskog sa masunod pa gid nga duha ka adlaw, kag maga-landfall sa China sa Lunes.
Antes ang tropical depressions, una na nga gin-report sang National Disaster Risk Reduction and Management Council (NDRRMC) nga pito na ang napatay sa pungsod bangud sa mabaskog nga pag-ulan halin pa sang naglinigad nga adlaw dala sang southwest monsoon kag low pressure area.
Lakip sa casualties suno sa council amo ang apat ka mga biktima sang landslides sa Pamucutan, Zamboanga City, duha nga nalumos sa Maramag, Bukidnon kag isa nga ginbawian sang kabuhi bangud sa Jose Abad Santos, Davao Occidental.
Lunsay ini nga natabo sang tinalikdan nga Hulyo 12.
Gina-validate man sang opisina ang dugang nga reports kun sa diin may mga nasamaran man kag nadula nga persona sa Northern Mindanao. Ang kumbinasyon nga epekto sang Habagat kag Low Pressure area ang nag-apekto man sa masobra 117,000 ka pamilya sa western sections sang Southern Luzon, sa Visayas kag sa Mindanao.
