ROXAS CITY – Magakadto sa pagbakal sa kagamitan sa panguma ang nadag-an nga P50,000 sang regional prize winner sa Visayas area sa grand draw sang Buena Mano Salvo Year 12 promo.
Sa exclusive interview sang Bombo Radyo Roxas kay Mrs. Mila Silvero 36-anyos sang Barangay Amaga, Sigma, Capiz, ginpahayag sini nga ini ang nangin desisyon nila nga mag-asawa para makaangkon sila sang kaugalingon nga gamit sa panguma.
Nagapasalamat ang ginang sa grasya nga nabaton bangud daku na nga bulig ang nadag-an nga kuwarta sa ila nga palangabuy-anan.
Gin-ako ni Silvero nga antes nagbiya sa ila puluy-an kahapon para magtrabaho sa ulumhan, hugot ini nga nagpangamuyo nga kuntani siya na ang makakuha sang grand prize nga isa ka milyon ka pesos.
Apang sa pihak nga wala sini nakuha ang target nga 1 million pesos, nagpasalamat man ang ginang bangud daku na nga bulig ang P50,000.
Nahibaluan nga nagatrabaho sa kampo ang ginang samtang driver sang tricycle ang mister sini.
Ginbugayan ang mag-asawa sang anum ka mga anak sa diin naga-edad na sang 15-anyos
ang ila subang nga anak.
