Ginatun-an sang Roxas City Government nga bawalan ang paglabay sang dalagku nga truck sa Homesite, Barangay Lawa-an, Roxas City.
Sa interview sang Bombo Radyo kay Roxas City Councilor Fernando Luis “Bords” Viterbo, iya ginpahayag nga ang dalan sa nasambit nga lugar ang tuman ka gamay kag takladon rason nga posible gid nga makatuga sang aksidente.
Suno pa kay Viterbo, madamu sang mga pamalay nga naga-istar sa kilid sang amo nga dalan nga may daku gid nga pamahog sa ila nga seguridad sa tion nga may ma-aberiya nga mga salakyan.
Nahibaluan nga pending pa sa second reading ang amo nga hagna bangud magapatigayon pa sang dry run kag public hearing sa masunod nga semana.
Pahayag pa niya, pagapanguhanahan sang traffic management unit ang dry run agud masiguro ang matawhay nga paglabay sang mga salakyan.
Nagapanawagan man ang natungdan sa mga driver nga mangin alerto ilabi na kun nagamaneho agud malikawan ang anuman nga sahi sang aksidente sa dalanon.
