ROXAS CITY – Daku ang mabulig sang employers sa mga trabahante kun ginbayaran lamang sang insakto ang ila kontribusyon sa Social Security System (SSS).
Ini ang ginpahayag ni Mr. Amiel Genova, Acting Senior Communications Analyst, sang SSS Western Visayas sang mainterview sang Bombo Radyo.
Suno kay Genova, kun magapadayon lang ang pagbayad sang kontribusyon, indi madelay ang pag-avail sa mga benepisyo sang ahensya, nga makabulig gid sat ion sang emerhensya kag kinahanglanon.
Agud maproteksyunan ang empleyado sang pribado nga sektor, nagpatigayon sang pagtsekyar ang Run After Contribution Evader (RACE) team sang Social Security System (SSS) sa pili nga mga establisiyemento sa syudad sang Roxas, agud magpahanumdom sa mga employer nga dapat bayaran sang mga ini ang kontribusyon sang ila mga empleyado.
Ini ang matapos ginpadalhan na sang series of billing kag na-istorya na sang account officers ang mga employers apang wala sa gihapon nakig-angut sa ahensya.
Pahayag pa sini, nga nagahatag sila sang show cause order kun sa diin ginahatagan sang 15 days nga plaso ang mga employer para magpadulong sa ila talapatan agud mahinalaan ang kontribusyon sang ila trabahante
Apang, sa ti-on nga indi ini pagtumanon sang employer, pagapasakaan ang mga ini sang kaso nga paglapas sa Republic Act 11199 ukon Social Security Act of 2019.
